აპოლოგეტიკა - ღია წერილი ილია მეორეს - oldorthodox

ღია წერილი

საქართველოში გაბატონებული,
ნიკონიანურ-რეფორმატორული "მართლმადიდებელი" კონფესიის პატრიარქ ილია II

საქართველოს ძველმართლმადიდებლური ეკლესიის გაზეთ "მართლმადიდებლის" რედკოლეგია (1999 წ. # 2 (21) 1999 წ.

საქართველოში მოქმედი კონსტიტუციით აღიარებულია დემოკრატიის, სინდისისა და სიტყვის თავისუფლება, მაგრამ, სამწუხაროდ, ჩვენს ყოფაში, სრულიად აშკარად უხეშად ირღვევა ადამიანის ეს ელემენტარული უფლებები, რაც ძველმართლმადიდებლურ ეკლესიასთან მიმართებაში გამოიხატებოდა ჩვენი ბეჭდვითი გამოცემების დევნა-შევიწროებით. კერძოდ, რამოდენიმე გამავრცელებელმა და წიგნის მაღაზიის გამყიდველმა არაორაზროვნად მიგვანიშნა, რომ ჩვენთან თანამშრომლობაზე და ჩვენი ეკლესიის ეგიდით დაბეჭდილი ჟურნალ-გაზეთების თუ წიგნების გავრცელებაზე თავს იკავებს გაბატონებული ეკლესიის ადეპტების ზეგავლენით.

მეტიც, თქვენი კონფესიის წარმომადგენლები პრესითა და ტელევიზიით (კონკრეტულად სამაუწყებლო კომპანია "ევრიკას" მეშვეობით) ეწევიან ძველმართლმადიდებლური ეკლესიის საწინააღმდეგო ცილისმწამებლურ კამპანიას, აცხადებენ რა ჩვენს ეკლესიას "სექტად".

სექტებისადმი ქართველ ერში არსებული ნეგატიური და ზოგჯერ აგრესიული განწყობილების ფონზე, ამგვარი უსაფუძვლო პროპაგანდა გამიზნულია მორწმუნე საქართველოს ასამხედრებლად ძველმართლმადიდებლური ეკლესიის წინააღმდეგ, რასაც მეტად სავალალო და ტრაგიკული შედეგები შეიძლება მოჰყვეს.

ყველამ კარგად უწყის თუ როგორ უფრთხილდება ძველმართლმადიდებლური ეკლესია მართლმადიდებლურ სარწმუნოებას, წმიდა გადმოცემას, მართალ წინაპართა სულიერ და კულტურულ მემკვიდრეობას, ეკლესიურ-მართლმადიდებლურ ყოფას; როგორ ცდილობს ის ერის ყოფიერებაში დანერგოს ქრისტეანობის მორალური პრინციპები. მაშინ, როდესაც იგივეს ვერ ვიტყვით გაბატონებულ, "მართლმადიდებელ" ეკლესიაზე. კერძოდ, ეკუმენიზმთან თქვენმა თანამშრომლობამ ლომის წილი დაიდო ერის სარწმუნოებრივ ინდიფერენტულობაში. ის ფაქტი, რომ ქართველი ერის დიდი ნაწილი სარწმუნოებრივი თვალსაზრისით დაოსებულია პაგანიზმით, მარჯვენას მარცხენისგან ვერ არჩევს, არ იცის სად იწყება ან მთავრდება წარმართული და სად ქრისტეანული, პირადად თქვენი და თქვენი ე. წ. "სამღვდელოების" დიდი დამსახურებაა, რასაც ემატება ძველმართლმადიდებლობის საწინააღმდეგოდ მიმართული ცივი ომი.

თქვენ არაფერს აკეთებთ იმისთვის, რათა ასწავლოთ ხალხს, როგორ გამიჯნოს ერთმანეთისგან მართალ წინაპართა ჯანსაღი გადმოცემა ეშმაკის მიერ ცთუნებულ წინაპართა წარმართული რიტუალებისგან. ჩვენი ერის ყოფიერებასა და ცნობიერებაში ისე ოსტატურად ნერგავთ ორივე ამ მსოფლმხედველობას (ქრისტეანულსა და წარმართულს), რომ ერში პრაქტიკულად ქრისტეანობის რანგშია აყვანილი წარმართული ჩვეულებები, ე. წ. "ხატობები" და "ჯვარობები", რომელთაც სახელწოდების გარდა არაფერი აქვთ ქრისტეანული.

ამგვარი პოლიტიკის შედეგია ერის გაორებული, სინკრეტული რელიგიურობით ცხოვრება. ეს თქვენი "კურთხევით" გამოცემულ საეკლესიო კალენდრებსაც კარგად ეტყობა, სადაც ქრისტეანულ დღესასწაულთა გვერდით, წარმართულ "დღეობებსაც" ელოლიავებით. ამ სინკრეტულ ნაზავში ამყოფებთ მორწმუნეებს და ამ დროს უმეცარი "სამღვდელოების" შემწეობით, თქვენი კონფესიის გულუბრყვილო მორწმუნეებს ძველი მართლმადიდებლობის წინააღმდეგ ამხედრებთ. ეს მიუტევებელი დანაშაულია, რომლისთვისაც თავის დროზე ქართველი ერი პასუხს მოგთხოვთ.

მაცხოვარი ბრძანებს: "გაყიდეთ ყველაფერი და იყიდეთ მახვილი". "მახვილი" - ეს ღვთის სიტყვაა, ანუ ის სულიერი იარაღია, რომელიც მართლმადიდებლობის მტერთა საწინააღმდეგოდ უნდა იყოს მიმართული. ჩვენც სწორედ მისთვის ვიყენებთ მას, რომ, თქვენგან განსხვავებით, გვსურს ვიქადაგოთ ძირძველი მართლმადიდებლობა და საღმრთო გზაზე დავაკვალიანოთ ჩვენი ერი.

ამაოდ ცდილობთ ჩვენს დაბრკოლებას: "უმზირი ცოდვილი მართალსა და დაიღრჭინნის მის ზედა კბილნი მისნი, ხოლო უფალი ეცინინ მას, რამეთუ წინაისწარ ხედავს, რამეთუ მოახს დღე მისი" (ფსალმ. 36:12-13). "მკლავნი ცოდვილთანი შეიმურსნენ, ხოლო განამტკიცნეს მართალნი უფალმან" (ფსალმ. 36:17).

ერის სასიკეთოდ თუ იღვწით, შეეშვით ძველმართლმადიდებელთა შევიწროებას, ნუ თესავთ შუღლს ძმათა შორის; გადმოდგით სამოყვრო ნაბიჯი, გონს მოიყვანეთ თქვენი ადეპტები, ხოლო თუ ვინმე თქვეგან დაუკითხავად ან თქვენი სინოდის განკარგულების გარეშე მოქმედებს და ზემოთ ნახსენები დევნა-შევიწროების შესახებ თქვენთვის არაფერია ცნობილი, გთხოვთ დაადასტუროთ წერილობით. აქვე გამცნობთ, რომ დუმილი თქვენი მხრიდან ჩაითვლება როგორც დასტური იმისა, რომ თქვენ და თქვენი სინოდი აქეზებთ მორწმუნეებს იმ უკანონო და ანტიკონსტიტუციური ქმედებებისკენ, რომელთა შესახებაც ზემოთ გვქონდა საუბარი.